COMUNICÁU DE XORRECER SOBRE L'ACTU DE DENUNCIA

"MUERTES 2006 "

Nel recién fináu 2006 fueron 84 les muyeres asesinaes a causa del terrorismu de xéneru. 84 vides que nun pudieron aguantar más palizes y tortures y que’l so desenlace a esa vida de terror foi la muerte.

Munchísimes más fueron les muyeres qu’ensin llegar a la muerte foron maltrataes. Dalgunes sofrieron en silenciu, otres denunciaron. De les denuncies dalgunes algamaron dalgún resultáu, pero munches solo algamaron que les sos denuncies s’archivaren nun caxón, cayendo nel escaezu.

Dende Xorrecer, como colleutivu independiente ya alternativu, queremos denunciar tamién el silenciu que dende les propies instituciones, tribunales, medios de comunicación, etc. fáese hacia esta llacr.
De les 84 muertes por terrorismu de xéneru, el Ministeriu del Interior solo reconoz 68 como “oficiales”, faciendo un vacíu a los munchos otros asesinatos qu’esti pasáu añu 2006 s’asocedieron.

Nes sos llistes del escaezu queden les muertes por agresiones sexuales, pol tráficu de muyeres, prostitución y otres munches de muyeres que pesie a nun mantener una rellación direuta de pareya o expareya tamién sofren esti terror.

Ensin duldia les más escaecies son les víctimes inmigrantes, que colen del so país a la gueta d’una vida meyor, pero qu’equí les sos illusiones muerren con elles.
Son les ensin nome, que cola so supuesta “illegalidá” nun eviten sofrir violencia sexista, pero en cambiu se-yos ñieguen los sos drechos a denunciar la so situación y nes llisten nun apaecen como víctimes del femenicidiu

Se suel dicir qu’añu nueu vida nuea, por eso dende Xorrecer desiximos que s’informe sobre la verdá del terrorismu de xéneru, qu’haiga medides reales y efectives p’evitar esta llacra, que denguna víctima de la violencia machista caiga nel escaezu ya’l silenciu.

Y por supuestu pidir a la sociedá que nun calle frenti a esti problema que d’una forma u otra afectanos a toos y toes. Porque esti xenocidiu colleutivu que sofren les muyeres en toes les partes del mundiu convirtiese nuna verdadera llacra social que debemos erradicar.

NEL 2006, NEL 2007 Y SIEMPRES:

ESCONTRA'L TERRORISMU DE XÉNERU DENGÚN PASU P'ATRÁS!!!

XORRECER EN SOFITU A LXS QUE LLUCHEN POLA LLIBERTÁ REPRODUCTIVA DE LA MUYER

Dende “Xorrecer, asociación escontra’l maltratu” amosamos la nuesa refuga a toos los actos que vayan escontra la llibertá reproductiva de la muyer.

Fae unos díes una clínica madrileña vióse atacada por un grupu de vándalos na nueche de los Santos Inocentes, acusando a la clínica d’asesinar a los güajes como fizu’l propiu Herodes en Belén.

Estos grupos defensores del nacional-catolicismu franquista, que faen alarde d’admirar un sistema misóxinu y sexista, intenten aún güei fomentar idegues d’odiu, ya seya escontra los homosexuales, escontra les muyeres que lluchen pola so lliberación y nesti casu, escontra les muyeres que deciden cuándo tener fíos.

El drechu al abortu ye un drechu básicu pa la muyer. Dende fae 20 años, en 1985, l’abortu nel estáu español ye llegal, y polo tantu toles muyeres pueden decidir el númberu de fíos a tener y si interrumpen o non un embarazu.

Enantes de 1985 les muyeres veíanse obligaes a practicar abortos de forma clandestina, p’vitar una conderga de cárcel, lo que suponía unes carencies sanitaries básiques. Munches d’elles pasaben llargos meses de dolores, otres quedaben con dalguna minusvalía física y dalgunes nun podíen volver a tener fíos enxamás.

Too esto diba xuníu a la refuga social, que tenía’l abortu como algo escontra’l deber divinu.

La Ilesia católica y el sistema totalitariu franquista defendíen la función reproductiva de la muyer pa dar fíos pa la “patria”, ensin dexar espaciu pa les decisiones personales acerca de si tener o non fíos.

Anguañu eso trata de superase, intentamos caleyar por un camín que defienda’l drechu de la muyer a decidir sobre’l so cuerpu y la so vida. La discriminación que sofre la muyer con respeutu al home y con respeutu al drechu a decidir sobre si mesma.

Pero los datos nun son mui positivos.

Nun sólo hay xente que diz defender el ¡¡¡“drechu a la vida”!!! frente a muyeres violaes, muyeres xóvenes, muyeres con discapacidá mental, muyeres que cuerren pelligru de morrer pol embarazu…Tamién atopamos n‘otros países casos peores:

- Un estimáu 13 % de les muertes maternes a nivel mundial atribúyense al abortu inseguru—entre 68.000 y 78.000 muertes anuales. Na so mayoría, estes muertes podríen evitase.

- Na práutica ye más probable que seyan les muyeres, y non los homes, les que enfrenten les mayores dificultades y desventaxes sociales nel ámbitu económicu y profesional, amás d’otros cambios qu’afecten la so vida cuando tienen fíos.

- Munchos países nun sólo conderguen con penes de cárcel a les muyeres que prautiquen abortos, dalgunos incluso les conderguen a muerte.

- Munches muyeres muerren durante abortos illegales o dempués del propiu abortu como consecuencia d’una nula atención post-abortu.

- "Drechu a decidir el númberu de fíos e intervalu entre los nacimientos” diz la ONU na so declaración de drechos, aunque nun siempre se cumpla.

- Ca añu, hasta 78.000 muyeres muerren como resultáu direutu del abortu illegal e inseguru.

- Un númberu desconocíu de muyeres sofren complicaciones de salú series y a vegaes permanentes como resultáu de los estimaos 20 millones d’abortos practicaos illegalmente nel mundu anualmente.

- Les complicaciones más comunes del abortu inseguru incluye la infertilidá, les infecciones series que pueden llevar la necesidá d’una histerectomía, les hemorraxies y les pérdides de sangre, la perforación uterina, l’enfermedá pélvica inflamatoria, y la dificultá de retener l’embarazu siguiente…

- Cuando l’abortu ye illegal, les clíniques clandestines escapen de la reglamentación y supervisión del gobiernu. Como resultáu, estes clíniques pueden operar ensin preocupase pola vida y salú de les muyeres.

Por eso dende Xorrecer amosamos el nuesu sofitu a toes les clíniques, organizaciones, muerganismos o persones a nivel particular que defiendan el drechu reproductivu de la muyer como un drechu básicu pa una vida acorde a los drechos humanos.

¡Por una vida reproductiva llibre!

¡Pola llibertá de la muyer a decidir sobre si mesma!

¡Despenalización real del abortu ya!

INTERVENCIÓN NA CONCENTRACIÓN ESCONTRA'L TERRORISMU DE XÉNERU ENTAMADA POR "XORRECER"

Hola a toes y toos.

Güei ye 25 de Payares, día internacional escontra la violencia haza la muyer.

Nun ye un día feliz nel nuesu calendariu. Mos duel que tenga qu’haber un día internacional escontra la violencia de xéneru porque significa qu’el terror y el sufrimientu siguen tando presentes ente nos.

Millones son les muyeres que viven escondides nel so propiu llar con mieu. Con mieu a salir a la cai, a falar con otra xente, a ser felices, con temor haza la so propia vida.

Estes muyeres viven enzarraes nes sos cases, baxu les garres d’un animal que-yos mata pocu a pocu. Baxu la so apariencia de bon vecinu escóndese la cara d’un salvaxe que se descubre nel calor del so llar.

Pero el terrorismu de xéneru y el maltratu hacia la muyer nun se limita sólo al hogar ya que cada vegada más xóvenes son maltrataes, vexaes o violaes poles sos pareyes.

Los crímenes mundiales escontra la muyer son atroces y esto queda reflexáu nos estudios sobre’l tema.

Cada 18 segundos una muyer ye maltratada física o psicolóxicamente n’alguna parte del mundiu. Nel Estáu Español van 500 muyeres muertes dende l’año 1999 y s’estima que les víctimas europees del terrorismu de xéneru esti añu sedrán 1000.

Violencia doméstica, violencia familiar, “supuesto agresor”, son dalgunes formes de denominar a esti horror diariu.

Pa nos ye terrorismu puro y duro, un terrorismu que nun tien tregua, unes vegaes relegáu al hogar, otres vegaes non, un terrorismu que ye la principal causa de muerte de muyeres en too’l mundiu, cobrándose un númberu sorprendente de vides y víctimes mundiales.

Si al terror que siente una muyer maltratada nun se-y pue llamar terrorismu, ¿Qué ye entos?

Nun escaezquemos que detrás de cada muyer maltratada, detrás de cada paliza hai una hestoria, hai una esperanza, una vida anulada a manes de la so pareya.

Nun debemos permitir esto, nun podemos callar ante’l terrorismu de xéneru, tenemos que facer que la nuesa voz la oigan toos y toes. Débese denunciar esta llacra pa que nin una sola muyer tenga que sufrir malos tratos pol simple fechu d’amar a una persona.

Güei y tolos díes queremos da-yos voz a toes esas muyeres que sufren o sufrieron malos tratos, y a toes les muyeres muertes a les que les nueses pallabres nun llegarán.

Ye cosa de toes y de toos finar col terrorismu de xéneru.

ESCONTRA’L MALTRATU, DENGÚN PASU P’ATRÁS

OCTAVILLES REPARTÍES NEL DÍA INTERNACIONAL ESCONTRA LA VIOLENCIA HACIA LA MUYER

ESCONTRA LA IMPUNIDÁ

Güei 25 de Payares ye’l Dia Internacional escontra la violencia hacia la muyer.

Desgraciadamente nun tenemos munchu que cellebrar.

Dende fae unos años fueron creándose diverses organizaciones, aumentando les campañes de sensibilización ya información sobre violencia hacia la muyer, pero paez que los resultaos nun son mui bonos.

Nel estáu español fueron asesinaes casi 500 muyeres dende 1999. Nesti añu 2006 ya van por 72 les víctimes de la violencia de xéneru.

Pero la cosa nun se queda nun asuntu a nivel estatal. La violencia escontra les muyeres existió durante tola hestoria y anguañu atópase en tol mundiu.

-Dos de cada tres muyeres en tol mundiu sofrieron agresiones o abusos a lo llargu de la so vida.

-Dos tercios de la población analfabeta nel mundiu son muyeres.

-El terrorismu de xéneru sitúase como primera causa mortal, per enriba del cáncer ya los accidentes de tráficu.

-En 1999 murieron a manes de les sos pareyes o familiares 14.000 muyeres en Rusia. Aún nun disponen de llei escontra la violencia de xéneru.

-De cada 10 muertas nel mundiu, 7 lo son a manes de les sos pareyes o expareyes

-En México, nos caberos 10 años desaparecieron cerca de 400 muyeres y murieron unes 370. Les autoridaes del estáu nun sólo nun investigan estos crímenes, que queden impunes, a vegaes incluso ocultanlos.

-Dende que’l réximen talibán fizose col poder n’Afganistán en 1996, prohibiose a les muyeres y neñes trabayar, estudiar, acceder a medicamentos, salir soles de casa, lleer, aprender a escribir… Nin siquiera tienen drechu a morir nel so día santu.

-Nos conflictos armaos d’América Llatina casi’l 70% de les muyeres indíxenes son violaes enantes de ser asesinaes.

-En tol mundiu solo’l 5% de les muyeres presenta denuncia ante una agresión.

-En Guatemala murieron más de 530 muyeres en 2005 y 527 muyeres embarazaes sofrieron agresiones. Nel 200, cuando entamaron a contase los asesinatos por violencia de xéneru, yeren 60 les muertes. En 2001 pasóse a 303.

Les causes d’esta discriminación son munches y complexes pero estos datos dexen entrever que la violencia de xéneru ye dalgo global, qu’afecta a millones de muyeres nel mundiu y que nun debe quedar impune.

Güei ye día 25 de Payares, día pa tratar d’erradicar esti feminicidiu colleutivu que sufren les muyeres en tol mundiu, pero ye nesti día cuando tenemos qu’entender que unu solu al año nun basta. Un llunes, martes, miércoles… Cualquiera del calendariu debe ser un día pa lluchar escontra la discriminación y la violencia, cada día de los 365 ye una oportunidá pa finar con millones d’asesinatos, qu’acaben cola vida de millones de seres humanos, nesti casu, muyeres.

¡ESCONTRA’L MALTRATU DENGÚN PASU P’ATRÁS!

CARTA ENVIADA A LA A.V.T POLA SOSPENSIÓN DE LOS SOS ACTOS PAL DÍA 25 DE PAYARES

Xorrecer, Asociación asturiana escontra la violencia de xéneru quier comunicales:

La so profunda refuga a la convocatoria de la AVT d’una manifestación que coincide col Día Internacional escontra la Violencia haza la Muyer, considerando esto como una ofensa a toes aquelles que ca 18 segundos sofren por parte de les sos pareyes o ex pareyes malos tratos.

Entendiendo que cada ciudadanu ye llibre de convocar una manifestación cuando considere oportunu pero teniendo en cuenta tamién la falta de respetu qu’esto supón a toes les agredides.

El Día Internacional escontra la Violencia de Xéneru lleva cellebrándose dende l’añu 1996 siendo un día d’especial importancia que sirve como mensaxe colleutivu pa concienciar escontra los malos tratos.

La nuesa asociación entiende que’l restu del añu (364 díes) son meyores pa manifestaciones qu’un día tan señaláu ya importante na llucha escontra la violencia.

Tamién mos permitimos recordavos que nos tres años ensin víctimes de ETA fueron asesinaes casi 300 muyeres nel Estáu Español a manos de les sos pareyes, tal y como recordó la portavoz de la Fundación Muyeres y de Red Feminista.

Consideramos, d’igual mou, que’l modificar el recorríu pa que nun coincidan ambos actos ye totalmente absurdu ya que aún asina el mensaxxe escontra la violencia de xeneru quedaría tapecíu mientres informase de la vuesa manifestación.

Ensin más, dende la nuesa asociación damos tol nuesu sofitu a toes eses asociaciones de muyeres que lluches escontra un terrorismu, que como bien dixeron “nun conoz tregua” y consideramos la so decisión de llevar a cabo los actos contra ETA como un atrevimientu, una falta de respetu haza les muyeres que sofren violencia de xéneru ya un intentu por ocultar y silenciar esti tipu de malos tratos.

Ensin más, despídese

Xorrecer, asociación escontra’l maltratu

RECHAZU TOTAL A LA VIOLENCIA COMO ALTERNATIVA AL DIÁLOGU

A pesar de la continua llucha de munchos colleutivos, organizaciones, asociaciones, etc. por lluchar escontra la violencia sexista cada día les cifres sorprendenmos más y más.

Muerte a la cual más cruel, denuncies que cada añu medren en casi el doble, segundes oportunidaes que finen en traxedia...

Ente esto la desesperación apodérase de nos. Nun sólo polos milenta casos selmanales, mensuales... Sino tamién polos casos qu'hai cerca de nos, que tamién son munchos e igual d'ablucantes.

La llucha nun ye fácil y toos debemos poner el nuesu granu d'arena pa combatir el sexismu pero, ¿cómo convencer a una muyer de que nun dé al so verdugu una segunda oportunidá? Nun ye posible de nenguna manera, nun pues obligar a naide.

Por eso día a día les coses ponénse más difíciles, lo que parecen avances convierténse en retrocesos, los llogros en fraudes... ¿De qué sirve una llei que condene nuna mayor medía a los maltratadores si aún asina siguen matando?

La rempuesta ye múltiple, variada, complexa...

Nos, desgraciadamente, nun tenemos la rempuesta. Nun tenemos un botón máxicu que al tocalu ficiera que les muyeres pudieran frayar les sos cadenes mortales, alloñándose del so maridu.

Ensin embargu, la esperanza sigue ehí, y dalgún día, esperemos, Xorrecer dexe d'esistir porque nun se necesite a naide ni ná qu'evite el maltratu. Esí sedrá el día que la violencia fine.

AGRADECIMIENTOS DE XORRECER

Xorrecer asociación escontra’l maltratu quier amosar el so agradecimiento a toes les organizaciones, colleutivos, medios contrainformativos y persones a nivel individual que dende la creación de la nuesa asociación mos vienen sofitando y mostrando el so interés pa que Xorrecer conviértase nuna referencia de la izquierda asturiana escontra la violencia de xéneru.

El nuesu colleutivu tien muy pocu tiempu de vida, sólo cuatru meses, pero nesi tiempu trabayamos perduru pa que la otra cara de la información sobre’l sexismu y el machismu tuviera disponible pa todxs teniendo en cuenta de que esto yera daqué casi inexistente nes esferes de la contrainformación Asturiana.

Somos conscientes de too el camín que queda per delantre y de la necesidá d’un cambiu total na nuesa estructura social pa llograr la igualdá, pa que más de 486 muyeres nun tornen a ser asesinaes en siete años, pa que nun existan diferencies llaborales por razones de sexu, raza, condición sexual…

A pesar de too lo que tamos faciendo la llucha ye llarga y precisamente por eso queremos agradecer a toes les asociaciones, organizaciones, colleutivos, etc, que dende’l primer momentu mos brindaron el so sofitu y mostráronse interesaos na idega de Xorrecer.

Nun creyemos que faiga falta dar nomes, cada un sabe quien ye; dende nuesu colleutivu tamos realmente agradecíos a todxs los que creen nesi cambiu y mos sofiten.

Porque ye por toos y toes conocida la terrible situación que pasa Asturies tantu no rellacionau col trabayu, cola mocedá, cola especulación inmobiliaria, coles cuantioses privatizaciones tantu de l’industria como de los servicios, etc.

Xorrecer amuesa una vegada más el so rechazu a les polítiques qu’impiden una sociedá xusta ya igualitaria en toos los sentíos, siendo la violencia de xéneru una de les tantes manifestaciones de que les nueses polítiques d’anguañu tan equivocaes.

Una vegada más, GRACIES a todxs y a siguir lluchando.

- Xorrecer, asociación escontra’l maltratu -

"XORRECER" ESCONTRA LA NUEVA MODA DEL REGGAETÓN

Nestos díes en que la violencia, el temor y la muerte son fechos cotidianos nes nueses vides, nesti mundiu onde cá hora nueves noticies de dolor lleguen a los nuesos oídos dende’l Líbano, Colombia, Guatemala, Palestina… atopámonos con nueves modes musicales llegaes dende'l continente americanu que traten de forma especial esta violencia inusitá.

Mientres persones en toes partes lluchen pa informanos ensin censures y ensin engaños, mientres continúa la perpetua defensa de la llibertá nueves modes musicales lleguen a la mocedá.

Una música machacona, voces puertorriqueñes, ritmos constantes y muy marcaos y lletres qu’impresionen a cualquiera.

A estes altures creo que toos y toes escuchamos dalguna vez, aunque sea de lloñe, la mencioná música: el reggaetón.

La llucha por defender la vida de toes les muyeres a lo llargu del mundiu, evitar la so discriminación, protexeles de lleis inhumanes que xustifiquen la violencia escontra elles…Y atopámonos, de pronto, con lletres como estes.

Agárrala, pégala, azótala, pégala
Sácala a bailar que va a to'as
Pégala, azótala, agárrala
( …)

Búscale un trago, fuletiao' de alcohol
Al rato van a sentirse mejor
Musica y alcohol
( …)

Sin miedo que no hace na'
Mírala, mírala, si se ríe le gusta
Yo le doy, tu le das, por delante y por detrás

( …)

Ella esta suelta, y nada va a evitar que yo la azote
Yo le someto, mamita, no te equivoques
( …)

Esto ye sólo un exemplu. Hay munches más. Esta en concretu nómase: Agárrala.

Lletres que dexen estupefactes a les persones que les oyen, pero qu'ensin embargu tan nos primeros puestos de llistes de venta. Too un éxitu, ensin duda.

Dende Xorrecer manifestamos el nuesu total rechazu a too tipo de lletres, canciones, textos y demás manifestaciones (ya sean escrites, verbales…) que promuevan el machismu, la intolerancia, el insultu y el despreciu a cualquier ser humanu, seya cual seya, nesti casu, la muyer.

La entruga que mos facemos dende Xorrecer ye: ¿qué ocurriría si esti tipu de lletres les ficieren o cantaren grupos consideraos “radicales”?

Pongamos a Soziedad Alkóholika como exemplu; fueron acusaos de apoloxía del terrorismu y pidiose pa ellos incluso la cárcel.

¿Porqué naide pide la cárcel pa estos cantantes de reggaetón que faen apoloxía de la violencia de xéneru? ¿Tien daqué que ver que ten nos númberos uno de llistes d’éxitos?

¿Si Soziedad Alkóholika interpretaren esti tipu de lletres con claru mensaxe misóxinu yos dexarían siguir tocando, como ocurre con los reggaetoneros, o yos demandaríen por apoloxía del maltratu?

Dende la nuesa organización decimos bien alto que OPONÉMONOS a too lo que discrimine y rechace al otru, seya muyer, inmigrante, indíxena…

Manifestamos el nuesu rechazu al reggaetón como música de claru conteníu machista y misóxinu y animamos a tol que lluche pola igualdá que rechace tamién too lo que contenga esti tipu de conteníos, que son claramente facistes

DALGUNES LLETRES

Por delante por detrás
por delante por detrás
por delante por detrás pa que te duela.

Y si ella se porta mal, dale con el látigo
se sigue portando mal, dale con el látigo

( …)

Te voy a dar un nalgazo
Te voy a dar un cocotazo
Te voy a amarrar los brazos
Después vas a seguir mi paso
Te voy a robar un beso
Pa´ que se me ponga tieso

( …)

Si a ella le gusta el sateo, pégala (pégame...)
Dale socio castígala, (castígame...)
Dale de toas maneras
Que ella es una zorra y... (rampletera)
( …)

Yo soy el sato de la joda
No quiero gatas que me hablen de boda
Si el bellakeo no pasa de moda
Deseo darte y devorarte en mi zona, vas pa la lona
Ánimo ánimo, hoy lo que tengo pa ti es látigo látigo

Si ella es brava
Azótala en la cama
Dale un poco de ramallama
Y si se envuelve
(Rómpela en dos, partela!)

xorrecer.org